Օրվա գլխավոր լուրերը՝ «մեկ տողով». 29.08.2018

Վրաստանում սեպտեմբերի 15-ից կարգելվի ավտոտրանսպորտով ցորենի կամ ցորենի ու տարեկանի ալյուրի ներմուծումն ու արտահանումը: Վրացական կողմը կթույլատրի դրանք փոխադրել միայն երկաթուղային կամ ծովային տրանսպորտով: Այդ երկրի ֆինանսների նախարարը պարզաբանել է, որ արգելքի պատճառը ռուս-վրացական սահմանին ավտոմեքենաների կուտակումներն են: Գործարարները, սակայն, այս կարգավորման դեմ են: Նշում են, որ դրա հետեւանքով հացի գինը կբարձրանա, քանի որ 1 տոննա ներկրված ցորենի գինն առնվազն 30 դոլարով կթանկանա: Բացի այդ՝ բեռնափոխադրումների ոլորտում աշխատող հազարավոր մարդիկ էլ գործազուրկ կդառնան:

Վրացական կողմի այս որոշումը կանդրադառնա նաեւ Հայաստանի վրա, բնականաբար՝ բացասաբար: Թեեւ տրանսպորտի նախարարությունն արդեն հայտնել է, որ նախնական պայմանավորվածությամբ՝ վրացական երկաթուղին պատրաստ է Հայաստան ներկրվող ցորենի համար զեղչային համակարգ կկիրառվի:

Հայաստանի Ագրարագյուղացիական միավորման նախագահի կարծիքով՝ Վրաստանը, որը միշտ հարստացել է Հայաստանի եւ հարեւան երկրների հաշվին, պատահական չի գնացել այդ քայլին. վերջին տարիներին, ծանրաբեռնվածության նվազման պատճառով, Փոթիի նավահանգստի տնտեսական վիճակը վատ է: Հրաչ Բերբերյանը նաեւ հաշվարկներ են ներկայացրել. այս պարագայում ցորենի ներկրման տրանսպորտային ծախսերը կավելանան 50-60 դոլարով, արդյունքում հացաբուլկեղենի գները երկրում 10-15 տոկոսով կբարձրանան: Բացի այդ՝ դժվար կացության մեջ կհայտնվեն նաեւ հայ բեռնափոխադրողները: